Madrid,
8 de maio de 2014.- Catorce millóns de persoas afectadas, catro millóns de
desprazadas, 6.201 falecidas e 1.785 desaparecidas, ademais dun millón de casas
danadas ou destruídas, só en Filipinas, foi o balance a principios deste ano
tras o paso do tifón Yolanda (tamén chamado Haiyán), nas illas de Leyte, Samar,
Cebú e Panai. Tras seis meses de traballo en Tacloban e Carigara, na illa de
Leyte, Médicos do Mundo España facilitou a asistencia sanitaria a unha
poboación de 200.000 persoas no distrito de Carigara, mentres que indirectamente
incidiu na recuperación dunha asistencia sanitaria adecuada para máis de 4
millóns de persoas, ao rehabilitar os dous hospitais desas zonas.
O
hospital EVRMC, de Tacloban, é o de referencia para a rexión VII, a máis
afectada polo tifón. Alí estase apoiando o sistema de vixilancia
epidemiolóxica, a xestión de farmacias hospitalarias e subministracións médicas
e o manexo adecuado de residuos hospitalarios. Traballar na redución de riscos
nunha área especialmente vulnerable aos desastres naturais tamén resulta
prioritario na estratexia de intervención da nosa organización na zona.
Quirófanos, radioloxía e obstetricia, prioritarias na rehabilitación de
hospitais
Os
proxectos para a recuperación funcional dos dous hospitais na illa de Leyte
céntranse no restablecemento da actividade e a mellora dos servizos de
urxencias no hospital de referencia de Tacloban (desde a optimización do fluxo
de pacientes até a formación específica en diferentes ámbitos técnicos) e na
rehabilitación e reconstrución de todo o hospital distrital de Carigara,
severamente danado na súa estrutura e equipamento. Préstase especial atención
ao quirófano (inoperativo despois do tifón e xa funcional) e á área de
radioloxía, así como ao laboratorio e aos servizos de obstetricia e saúde
sexual e reprodutiva, prioridades sempre na intervención de Médicos do Mundo
España. Ademais, adquiriuse equipamento médico e unha ambulancia para a
derivación de pacientes críticos a Tacloban. Así mesmo, aquí estase traballando
nunha planta de tratamento de residuos hospitalarios que permitirá ao hospital
posuír un plan de xestión integral dos residuos, evitando carrexar
inconvenientes aos pacientes, ao persoal, á poboación e ao medioambiente.
Cooperación a longo prazo, a aposta de Médicos do Mundo
Médicos
do Mundo España, dentro da súa filosofía de actuación, aposta por un traballo
de cooperación ao desenvolvemento a longo prazo nos lugares nos que actuou
previamente como organización humanitaria, con tarefas de emerxencia. E é que,
unha vez apagados os focos mediáticos, resulta esencial a reconstrución
completa de infraestruturas, a rehabilitación e adecuación dos servizos de
saúde básicos e o traballo con toda a comunidade na preparación e redución de
risco en caso de desastres, nunha rexión da terra especialmente proclive
ás catástrofes naturais.
XUNTANSE FOTOGRAFÍAS DOS
HOSPITAIS DE TACLOBAN E CARIGARA TOMADAS POLO EQUIPO DE MÉDICOS DO MUNDO EN
FILIPINAS
